సీఐ, మహిళా ఎస్ఐ మధ్య వ్యవహారంతో పాటు అలాంటిదే మరో విషయంలో మొత్తంగా ముగ్గురు పోలీసు అధికారులు సస్పెన్షన్‌కు లోనయ్యారు. వరంగల్ పోలీస్ కమిషనరేట్ పరిధిలోని గీసుగొండ పోలీస్ స్టేషన్ ఇన్సెస్పెక్టర్‌గా విధులు నిర్వహిస్తున్న ఆర్. వెంకటేశ్వర్లు, దామెర పోలీస్ స్టేషన్ ఎస్ఐ ఏ. హరిప్రియ, సుబేదారి ఎస్ఐ పున్నం చందర్‌ను సస్పెండ్ చేస్తూ వరంగల్ పోలీస్ కమిషనర్ ఏవీ. రంగనాథ్ ఉత్తర్వులు జారీచేశారు. ఇన్స్పెక్టర్ ఆర్.వెంకటేశ్వర్లు, ఎస్ఐ హరిప్రియ ఇరువురు గత కొద్ది రోజులుగా హద్దులు మీరి వ్యవహరించడంతో మహిళా ఎస్ఐ భర్త పోలీసులకు ఫిర్యాదు చేసిన విషయం తెలిసిందే. అయితే వాళ్లిద్దరి వ్యవహారంపై విచారణ చేపట్టిన ఉన్నతాధికారులు సీఐ వెంకటేశ్వర్లు, మహిళ ఎస్ఐ హరిప్రియను సస్పెండ్ చేస్తూ ఉత్తర్వులు జారీచేశారు.

మరో ఘటనలో సుబేదారిలో నివాసం వుంటున్న ఓ యువతి గత కొద్ది రోజులుగా లైంగిక వేధింపులకు గురవుతోంది. ఈ విషయాన్ని పోలీసులకు చెప్పి రక్షణ అడుగుదామని సుబేదారి పోలీస్ స్టేషన్‌ను ఆశ్రయించింది. అయితే ఆ ఠాణాలో ఎస్ఐగా ఉన్న పున్నం చందర్‌ మాత్రం నిందితుడిపై కేసు నమోదు చేయకుండా రాజీపడాల్సిందిగా బాధితురాలిపై ఒత్తిడి తీసుకొచ్చాడు. ఈ విషయంపై బాధిత యువతి ఉన్నతాధికాలకు ఫిర్యాదు చేయగా దీనిపై తీవ్రంగా స్పందించారు. ఎస్ఐ పున్నం చందర్‌ను సస్పెండ్ చేస్తూ వరంగల్ పోలీస్ కమిషనర్ ఉత్తర్వులు జారీచేశారు.