కొద్దిరోజుల్లో ఆనందంగా పెళ్లిపీటలెక్కాల్సిన యువతి జీవితాన్ని నరకం చేసేశారు నీచులు. నమ్మివచ్చినందుకు నట్టేట ముంచారు, అడవిలోకి తీసుకెళ్లి అత్యాచారం చేశారు కామాంధులు. ఆ దారుణాన్ని వీడియోలు, ఫొటోలు తీసి ఏకంగా పెళ్లికొడుక్కి పంపించి పైశాచికానందం పొందారు. ఇంటికి కాబోయే అల్లుడు ఆ వీడియోలను కన్నోళ్లకి చూపించడంతో కుదేలైపోయారు. కష్టం నుంచి తేరుకుని పోలీసులకు ఫిర్యాదు చేయడంతో కీచకులను కటకటాల వెనక్కి నెట్టారు. ఆలస్యంగా వెలుగులోకి వచ్చిన ఈ దారుణ ఘటన మహబూబ్‌నగర్ జిల్లాలో జరిగింది. హన్వాడ మండలం కొత్లాబాద్‌కి చెందిన యువతి(20) మహబూబ్‌నగర్‌లో కూలీ పనికి వెళ్తుండేది. రోజూ గ్రామం నుంచి జిల్లా కేంద్రానికి వచ్చి వెళ్లేది. సమీపంలోని మల్కాపూర్‌కి చెందిన రాజేందర్ రెడ్డి కొత్లాబాద్‌ అమ్మాయిని వివాహం చేసుకున్నాడు. భార్య పుట్టింటి వద్ద ఉండడంతో పెయింటింగ్ పనిచేసే రాజేందర్‌రెడ్డి అక్కడి నుంచే రోజూ మహబూబ్‌నగర్ వచ్చి పని చేస్తున్నాడు. ఈ క్రమంలో పలుమార్లు రాజేందర్‌రెడ్డి బైక్‌పై యువతికి లిఫ్ట్ ఇచ్చాడు. దీంతో ఇద్దరి మధ్య పరిచయమైంది.

ఈ నెల 5వ తేదీన యథావిధిగా యువతి పని కోసం మహబూబ్‌నగర్ వెళ్లింది. ఆ రోజు పని దొరకలేదని చెప్పడంతో రాజేందర్ రెడ్డి, అతని స్నేహితుడు ఆంజనేయులు ఆమె వద్దకు వెళ్లారు. తాము పని ఇప్పిస్తామని చెప్పి ఆమెను బైక్‌ ఎక్కించుకుని ఫతేపూర్ సమీపంలో పొదల్లోకి తీసుకెళ్లారు. అక్కడ ఆమెతో బలవంతంగా మద్యం తాగించి దారుణానికి ఒడిగట్టారు. యువతిపై రాజేందర్ రెడ్డి అత్యాచారం చేశాడు. ఆ అకృత్యాన్ని ఆంజనేయులు వీడియోలు, ఫొటోలు తీశాడు. ఈ విషయం ఎవరికైనా చెబితే చంపేస్తామని బెదిరించారు. అంతటితో ఆగని దుర్మార్గులు ఆ వీడియోలు, ఫొటోలను పెళ్లికొడుక్కి పంపించడంతో దారుణం వెలుగుచూసింది. కీచకుల దాష్టీకానికి బలైన వీడియోలు, ఫొటోలను పెళ్లికొడుకు యువతి తల్లిదండ్రులకు చూపించడంతో కంగుతిన్నారు. తమ కూతురు జీవితాన్ని పాడు చేసిన కీచకులపై చర్యలు తీసుకోవాలని బాధితురాలి తల్లిదండ్రులు పోలీసులను ఆశ్రయించడంతో ఖాకీలు రంగంలోకి దిగారు. కీచకులను అరెస్టు చేసి కటకటాల వెనక్కి నెట్టారు.