నాలుగేళ్ల పాపకు నచ్చని తల్లి, అదే నిజం అందుకే ఘోరం..
హైదరాబాద్‌లో సంచలనం రేపిన పంజాగుట్ట పాప మర్డర్ కేసును పోలీసులు ఛేదించారు. కన్నతల్లే అత్యంత కర్కశంగా కడుపున పుట్టిన బిడ్డను అంతమొదించినట్లు తేల్చారు. తండ్రి జైలుకెళ్లడం తల్లి మరొకరితో కలసి దేశదిమ్మరిగా తయారవడంతో పాటు పిల్లలతో బెగ్గింగ్ చేస్తూ జల్సాలు చేస్తున్న వైనాన్ని చిన్నారి సైతం జీర్ణించుకోలేకపోయింది. తల్లిని మరొకరితో చూసి ఈసడించుకున్న చిన్నపాప అడుక్కోవడం వద్దు నాన్న దగ్గరికే వెళ్లిపోదామనడంతో కోపంతో రగిలిపోయిన కసాయి, ప్రియుడితో కలిసి దారుణానికి ఒడిగట్టింది. నగరంలోని డబీర్‌పురా సునార్ గల్లీకి చెందిన మొహహ్మద్ అహ్మద్, హీనా బేగం(22) భార్యాభర్తలు. హోటల్ వర్కర్‌గా పనిచేసే అహ్మద్ దొంగతనాలు చేసేవాడు. మియాపూర్ పరిధిలో జరిగిన చోరీ కేసులో రిమాండ్‌లో ఉన్నాడు. వారికి ముగ్గురు పిల్లలు ఎఫాన్(7), మెహీక్(4), మెహెరా(3) సంతానం. భర్త జైలుకెళ్లిన తర్వాత హీనా బేగంకి షేక్ మొహమ్మద్ ఖాదర్‌తో పరిచయమైంది. షేక్‌పేట్‌లోని ఓ కల్లు కాంపౌండ్‌లో పరిచయమైన ఖాదర్‌తో హీనా తన సమస్యలు చెప్పుకునేది. ఇద్దరి మధ్య సాన్నిహిత్యం పెరిగి వివాహేతర సంబంధానికి దారితీసింది. హీనాను పెళ్లి చేసుకుంటానని, పిల్లలను కూడా చూసుకుంటానని ఖాదర్ చెప్పడంతో ఆమె అతనితో వెళ్లిపోయింది.

కొడుకు ఎఫాన్, నాలుగేళ్ల కూతురు మెహీక్‌ని తీసుకుని ప్రియుడితో కలసి ముంబై, ఢిల్లీ, జైపూర్, మనాలి, చెన్నై, బెంగళూరు తదితర ప్రాంతాల్లో తిరిగారు. ఆయా నగరాల్లో బిచ్చమెత్తుకుంటూ కాలం గడిపేవారు. పిల్లలతో కూడా భిక్షాటన చేయిస్తూ జల్సాలు చేశారు. తండ్రి అహ్మద్‌తో కాకుండా ఖాదర్‌తో సన్నిహితంగా ఉండడం చూసిన చిన్నారి ఈసడించుకునేది. తెలిసీ తెలియని వయసైనా ఇక్కడొద్దు తండ్రి దగ్గరికెళ్దామని మారాం చేసేది. భిక్షాటన చేసేందుకు కూడా చిన్నారి మెహీక్ వెళ్లేది కాదు. దీంతో కోపంతో రగిలిపోయిన తల్లి ప్రియుడితో కలసి అభం శుభం తెలియని చిన్నారిని చితకబాదేది. ఈ నెల 3న తల్లి, ప్రియుడు కలసి చిన్నారిని దారుణంగా కొట్టడంతో స్పృహ తప్పిపడిపోయింది. భయపడిపోయిన ఇద్దరూ పాపని తీసుకుని బస్సులో హైదరాబాద్ చేరుకున్నారు. బస్సులో వస్తుండగానే పాప శరీరం చల్లబడిపోయి, చలనం లేకపోవడంతో ఆమె చనిపోయినట్లు నిర్ధారించుకున్న దుర్మార్గులు గుట్టుచప్పుడు కాకుండా వదిలించుకునేందుకు సిద్ధమయ్యారు.

నిమ్స్ సమీపంలోని కాలనీలో పడేసి వెళ్లిపోయారు. నిమ్స్ సమీపంలో పడేస్తే పేద రోగులు పాప శవాన్ని తీసుకెళ్లలేక పడేసి ఉంటారని అనుకుంటారని దుర్మార్గులు ద్వారకాపురి కాలనీలోని ఓ దుకాణం ముందు పడేసి వెళ్లిపోయారు. పాప శవం గుర్తించిన స్థానికులు పోలీసులకు సమాచారం అందించడంతో సంఘటన స్థలానికి చేరుకుని పరిశీలించారు. పాప ఒంటిపై గాయాలు పోస్టుమార్టం రిపోర్ట్‌లో గాయాలతో పాప చనిపోయినట్లు తేలడంతో హత్య కేసుగా నమోదు చేసి కేసు విచారణ చేపట్టారు. పాప శవం అక్కడ పడేసిందెవరన్న కోణంలో విచారించిన పోలీసులు వందల కొద్దీ సీసీ కెమెరాల ఫుటేజీలను పరిశీలించడంతో చిన్న క్లూ దొరికినట్లు తెలుస్తోంది. ముసుగు ధరించిన మహిళ మరొకరితో కలసి పాప డెడ్‌బాడీని అక్కడ పడేసి వెళ్లినట్లు గుర్తించిన పోలీసులు ఆ దిశగా విచారణ చేపట్టారు. నిందితులను ట్రేస్ చేసిన పోలీసులు ప్రత్యేక టీమ్‌లను ఏర్పాటు చేసి కర్ణాటక, మహారాష్ట్ర రాష్ట్రాల్లో గాలించారు. ఎట్టకేలకు కర్ణాటకలో నిందితులను గుర్తించి అరెస్టు చేసి నగరానికి తీసుకొచ్చారు. వివాహేతర సంబంధం అడుక్కుతినడం ఇష్టం లేదన్నందుకు చిన్నారిని చంపేసిన కసాయి తల్లిని, ఆమె ప్రియుడిని కటకటాల వెనక్కి నెట్టారు.