కేంద్ర ఆరోగ్య కుటుంబ సంక్షేమ శాఖ కీలక మార్పులకు శ్రీకారం చుట్టింది. మెడికల్‌ అడ్మిషన్లకు అఖిల భారత స్థాయిలో నీట్‌ పరీక్ష నిర్వహిస్తున్న మాదిరిగానే, నర్సింగ్‌ కోర్సుల్లో ప్రవేశాలకూ ప్రవేశ పరీక్షను నిర్వహించనుంది. ఇప్పటి వరకూ బీఎస్సీ నర్సింగ్‌ కోర్సులో ప్రవేశాలకు ఇంటర్‌ మార్కులను ప్రాతిపదికగా తీసుకుంటుండగా, ఇక నుంచి జాతీయ స్థాయిలో ఒకే పరీక్ష నిర్వహించి, అందులో మార్కులు, ర్యాంకుల ఆధారంగా అన్ని రాష్ట్రాల్లోనూ నర్సింగ్‌ కాలేజీల్లో ప్రవేశాలను ఖరారు చేస్తారు. అలాగే, ప్రస్తుతమున్న జాతీయ నర్సింగ్‌ మండలి(ఐఎన్‌సీ) స్థానంలో జాతీయ నర్సింగ్‌ అండ్‌ మిడ్‌వైఫరీ కమిషన్‌ను తీసుకురావాలని కేంద్ర ప్రభుత్వం నిర్ణయించింది. ఇందు కోసం 1947 జాతీయ నర్సింగ్‌ మండలి బిల్లును సవరిస్తూ నూతన నర్సింగ్‌ కమిషన్‌ బిల్లును రూపొందించింది. ఈ బిల్లుపై డిసెంబ‌రు 6వ తేదీ లోపు ప్రజలు, నిపుణులు, మేధావులు తమ అభిప్రాయాలు, సలహాలు, సూచనలను [email protected] ఈ మెయిల్‌కు పంపించాలని కేంద్ర ఆరోగ్యశాఖ అదనపు డైరెక్టర్‌ జనరల్‌ (నర్సింగ్‌) డాక్టర్‌ రాతి బాలచంద్రన్‌ కోరారు.

అప్పుడు అలా:

ఇప్పటివరకు బీఎస్సీ నర్సింగ్‌లో చేరాలంటే ఇంటర్‌ బైపీసీ అర్హతగా ఉంది. ఓపెన్‌ కేటగిరీలో 45%, రిజర్వేషన్‌ కేటగిరీలో 40% మార్కులు సాధించిన వారు కాళోజీ నారాయణరావు ఆరోగ్య విశ్వవిద్యాలయం ప్రవేశ ప్రకటన అనంతరం దరఖాస్తు చేసుకోవాలి. మార్కులు, రిజర్వేషన్ల ఆధారంగా సీట్లు కేటాయిస్తారు. ఇక ఎంఎస్సీ నర్సింగ్‌ కోర్సులో చేరాలంటే బీఎస్సీ నర్సింగ్‌ 50 శాతం మార్కులతో ఉత్తీర్ణులై ఉండాలి. అలాగే ఏడాదిపాటు ఎక్కడో ఒకచోట పనిచేసిన అనుభవం ఉండాలి. అలాంటివారికి వారి మార్కులు, రిజర్వేషన్ల ఆధారంగా సీటు కేటాయిస్తారు. 2014కు ముందు ఎంఎస్సీ నర్సింగ్‌లో చేరేందుకు ఎంట్రన్స్‌ నిర్వహించేవారు. తదనంతరం దాన్ని తీసివేశారు. ప్రస్తుతం దేశంలో బీఎస్సీ, ఎంఎస్సీ నర్సింగ్‌ కోర్సుల్లో చేరడానికి మార్కులే అర్హత.

ఇకపై ఇలా:

ఇప్పటి వరకు నర్సింగ్‌ కోర్సు పూర్తయ్యాక రాష్ట్రాల్లోని నర్సింగ్‌ కౌన్సిళ్లలో రిజిస్ట్రేషన్‌ చేయించుకొని ప్రభుత్వ, ప్రైవేట్‌ ఆసుపత్రుల్లో నర్సులుగా చేరేవారు. ఇకపై నర్సింగ్‌ వృత్తి చేపట్టడం అంత సులువు కాదు. నర్సింగ్‌ విద్యలో నాణ్యతను పెంచడానికి కొత్తగా జాతీయస్థాయిలో నీట్‌ తరహా ఎంట్రన్స్‌ టెస్ట్‌ నిర్వహిస్తారు. దీన్ని యూనిఫామ్‌ ఎంట్రీ ఎగ్జామ్‌గా పేర్కొన్నారు. ఇందులో అర్హత సాధించినవారు జాతీయ, రాష్ట్రస్థాయి విద్యాసంస్థల్లో చేరడానికి అవకాశం ఉంటుంది. ఇక నర్సింగ్‌ కోర్సు పూర్తయినవారికి మళ్లీ నేషనల్‌ ఎగ్జిట్‌ ఎగ్జామ్‌ ఉంటుంది. అందులో అర్హత సాధించిన వారే నర్సింగ్‌ వృత్తి చేపట్టడానికి లేదా ఎంఎస్సీ కోర్సులో చేరడానికి అర్హులు.

తాజా బిల్లులోని ప్రధానాంశాలు:

  • నర్సింగ్‌ కోర్సు సిలబస్‌ ఆలిండియా స్థాయిలో ఇంగ్లిష్‌లో మాత్రమే ఉంటుంది.
  • కాలేజీల్లో నర్సింగ్‌ విద్యా ప్రమాణాలను పెంచాలి. నైపుణ్యం, విజ్ఞానం, ప్రవర్తన, విలువలు, నైతికత, హెల్త్‌కేర్, పరిశోధన వంటివి నేర్పించాలి. పోటీతత్వం పెంచాలి.
  • అంతర్జాతీయ స్థాయి ప్రమాణాలతో నర్సింగ్‌ విద్యాసంస్థలను తీర్చిదిద్దేలా మార్గదర్శకాలు రూపొందించాలి.
  • మౌలిక సదుపాయాల కల్పన, మంచి ఫ్యాకల్టీని కల్పించడం ద్వారా నాణ్యతను పెంచాలి.
  • అంతర్జాతీయ స్థాయిలో నర్సింగ్‌ ఫ్యాకల్టీకి శిక్షణనివ్వాలి.
  • కమిషన్‌ అమల్లోకి వచ్చిన తరువాత మూడేళ్లలోపునే జాతీయస్థాయి ప్రవేశ పరీక్షను తీసుకొస్తారు. బిల్లు పాసైన ఐదేళ్లలో నేషనల్‌ ఎగ్జిట్‌ ఎగ్జామ్‌ అమలు చేస్తారు.
  • నూతన బిల్లులో నర్సింగ్‌ కాలేజీలను థర్డ్‌ పార్టీతో తనిఖీలు చేయిస్తారు.
  • ఏఎన్‌ఎంలను, ఆరోగ్య కార్యకర్తలను నర్స్‌ అసోసియేట్‌గా పిలుస్తారు.