ఇప్పటి వరకూ లైన్ మెన్ పోస్టులన్నీ పురుషులకే పరిమితం కాగా, సిద్ధిపేట జిల్లాకు చెందిన బబ్బూరి శిరీష, మహబూబాబాద్ జిల్లాకు చెందిన భారతీ సరికొత్త రికార్డ్ క్రియేట్ చేశారు. మహిళలు అన్ని రంగాల్లో దూసుకుపోతున్నారు. పురుషులతో పోలిస్తే తాము ఎందులోనూ తీసిపోమని నిరూపిస్తున్నారు. సైన్యంలోనైనా విమానాలు నడపడంలోనైనా, పురుషులతో సమానంగా రాణిస్తున్నారు. మహిళలు చేయలేని పనంటూ లేదు ఇప్పుడు. సిద్ధిపేట జిల్లా మర్కూక్ మండలం గణేశపల్లికి చెందిన 20 ఏళ్ల యువతి తెలంగాణలో తొలి మహిళా లైన్ ఉమెన్‌గా రికార్డ్ క్రియేట్ చేసింది.

టీఎస్ఎస్‌పీడీసీఎల్ లైన్ మెన్ ఉద్యోగాల కోసం నోటిఫికేషన్ జారీ చేయగా గజ్వేల్ నియోజకవర్గానికి చెందిన బబ్బూరి శిరీష మహబూబాబాద్ జిల్లాకు చెందిన వి. భారతీ దరఖాస్తు చేసుకున్నారు. కానీ దరఖాస్తును తిరస్కరించడంతో వీరిద్దరూ 2019లో హైకోర్టును ఆశ్రయించారు. 18 అడుగుల ఎత్తయిన కరెంట్ స్తంభాలు ఎక్కడం, లైన్‌ ఉమెన్‌గా పని చేయడం మహిళలకు కష్టం అవుతుందని టీఎస్‌ఎస్‌పీడీసీఎల్ అభిప్రాయపడింది.

కానీ ఐటీఐ పూర్తి చేసిన శిరీష మరో 8 మంది మహిళలతో కలిసి హైకోర్టుకు వెళ్లడంతో టీఎస్‌ఎస్‌పీడీసీఎల్ తన నిర్ణయాన్ని మార్చుకొని దరఖాస్తు చేసుకోవడానికి అనుమతి ఇచ్చింది. 8 మంది ఈ లైన్‌ ఉమెన్ పోస్టుకు దరఖాస్తు చేసుకోగా శిరీశ, భారతీ మాత్రమే రాత పరీక్షలో అర్హత సాధించారు. టీఎస్‌ఎస్‌పీడీసీఎల్ మహిళల రాత పరీక్ష ఫలితాలను ప్రకటించకపోవడంతో శిరీశ, భారతీ మరోసారి కోర్టును ఆశ్రయించారు. వీరికి పోల్ టెస్టు జరపాలని హైకోర్టు ఆదేశించింది. నిమిషంలోపే పోల్ ఎక్కిన శిరీషతోపాటు భారతీ సైతం పోల్ టెస్టులో పాసయ్యింది. పోల్ టెస్టులో పాసైన నెల రోజుల్లోగా అపాయింట్‌మెంట్ లెటర్లు ఇవ్వాలని హైకోర్టు టీఎస్‌ఎస్‌పీడీసీఎల్‌ను ఆదేశించింది. దీంతో రాష్ట్రంలోని తొలి మహిళ లైన్ ఉమెన్‌గా వీరు చరిత్ర సృష్టించారు.