పత్తి సాగు నష్టాలు తెచ్చింది, కనీసం పెట్టుబడి రాలేదు, సొంతంగా ఎకరం భూమి ఉన్నా అమ్ముకుని బ్రతికేవాళ్లం కానీ ఎకరం భూమి లేదు. అందుకే అత్మహత్య చేసుకుంటున్నాం. మావి మధ్య తరగతి బ్రతుకులు, అప్పులు ఇజ్జత్‌కా సవాలుగా‌ మారాయి. అందుకే అత్మహత్య చేసుకుంటున్నాం అన్నా వదినా మమ్మల్ని క్షమించండి అని లేఖ రాసిన కౌలు రైతు కుటుంబం ఆత్మహత్యకు పాల్పడిన విషాద ఘటన మంచిర్యాల జిల్లాలో చోటుచేసుకుంది. కాసిపేట మండలం మలకపల్లికి చెందిన జంజిరాల రమేష్ (40) కౌలు రైతు. అతడికి భార్య పద్మ(35), కుమారుడు అక్షయ్ కుమార్ (17), కుమార్తె సౌమ్య(19) ఉన్నారు. ఇటీవలే అప్పు చేసి మరీ పత్తి పంట సాగు చేయగా తీవ్ర నష్టం వచ్చింది. దీనికి తోడు అప్పు ఇచ్చిన వ్యక్తి తిరిగివ్వాలంటూ ఒత్తిడి తీసుకొస్తున్నాడు. దీంతో మార్చి 25న(గురువారం) అప్పు తీరుస్తానని రమేష్ అతడికి మాటిచ్చాడు. గడువు తేదీ సమీపించినా అప్పు తీర్చే మార్గం కనిపించక అతడు మానసికంగా కుంగిపోయాడు.

రుణం తీర్చలేక పరువు పోగొట్టుకోవడం కంటే ప్రాణం తీసుకోవడం మేలని నిర్ణయించుకున్నాడు. గురువారం తెల్లవారుజామున భార్య, పిల్లలతో కలిసి ఇంట్లోనే ఉరేసుకుని ఆత్మహత్య చేసుకున్నాడు. ఈ విషయాన్ని గమనించిన పోలీసులు వెంటనే పోలీసులకు సమాచారం ఇచ్చారు. దీంతో పోలీసులు సంఘటనా స్థలానికి చేరుకుని పరిశీలించారు. మృతదేహాలను ప్రభుత్వాసుపత్రికి తరలించారు. ఒకే కుటుంబంలోని నలుగురు ఆత్మహత్య చేసుకోవడంతో గ్రామంలో విషాద ఛాయలు అలుముకున్నాయి.