లైసెన్స్‌ లేని యువతికి వాహనం ఇచ్చి ఆమె ప్రాణాలు పోవడానికి కారణమైన యువకుడిని కటకటాల్లోకి నెట్టారు హైదరాబాద్ కేపీహెచ్‌బీ పోలీసులు. ఈ నెల 20వ తేదీ రాత్రి హైదర్‌నగర్‌ వద్ద జరిగిన రోడ్డు ప్రమాదంలో బీడీఎస్‌ విద్యార్థిని ఆది రేష్మ(20) చనిపోయిన సంగతి తెలిసిందే. ఈ ఘటనలో రేష్మకు స్కూటీ ఇచ్చిన అజయ్‌సింగ్‌ను పోలీసులు అరెస్టు చేశారు. కేపీహెచ్‌బీ సీఐ లక్ష్మీనారాయణ కథనం ప్రకారం: కడప జిల్లా బద్వేల్‌ మండలం శాస్ర్తీనగర్‌కు చెందిన మేదా చంద్రశేఖర్‌ కుమార్తె ఆది రేష్మ(20) కర్ణాటకలోని గుల్బర్గా‌లో బీడీఎస్ కోర్సు చదువుతోంది. హైదరాబాద్‌కు వచ్చిన సందర్భంగా ఈ నెల 20 స్నేహితులతో కలిసి మియాపూర్‌లోని జీఎస్ఎం మాల్‌‌లో సినిమా చూసేందుకు వెళ్లింది. తిరిగొచ్చే క్రమంలో స్నేహితుల్లో ఒకరైన అజయ్‌సింగ్‌ నడుపుతున్న స్కూటీపై ఆమె వెనకాల కూర్చుంది.

రాత్రి 11.40 గంటల సమయంలో మార్గమధ్యలో జలమండలి కార్యాలయం వరకు రాగానే తాను స్కూటీ నడుపుతానని రేష్మ పట్టుబట్టింది. కొంతదూరం నడిపిన అనంతరం స్కూటీ అదుపు తప్పి ఇసుక లారీ చక్రాల కింద పడిపోవడంతో అక్కడికక్కడే ప్రాణాలు కోల్పోయింది. రేష్మకు బండి నడపడం రాదు. పైగా లైసెన్స్‌ కూడా లేదు. ఈ విషయం తెలిసి కూడా ఆమె ఇచ్చిన వాహనం ఇచ్చిన అజయ్‌సింగ్‌పై పోలీసులు కేసు నమోదు చేశారు. సోమవారం అతడిని అరెస్ట్ చేసి కోర్టులో హాజరుపరిచారు. న్యాయస్థానం రిమాండ్‌ విధించడంతో జైలుకు తరలించారు. ఈ ఘటనలో ఇసుక లారీ డ్రైవర్‌ కృష్ణ పరారీలో ఉన్నట్లు పోలీసులు తెలిపారు.