వరంగల్‌లో జిల్లాలో దారుణ ఘటన చోటు చేసుకుంది. సర్పంచ్ పదవి కోసం తన రెండో భార్యకు విడాకులిచ్చిన భర్త, ఆమె రెండో పెళ్లి చేసుకోవడాన్ని జీర్ణించుకోలేకపోయాడు. మాజీ భార్య రెండో భర్తపై తన అనుచరులతో హత్యాయత్నం చేయించాడు. ఈ ఘటనలో అతని చేయి తెగిపడింది. చనిపోయాడనుకున్న దుండగులు అక్కడి నుంచి వెళ్లిపోవడంతో అతను ప్రాణాలతో బయటపడ్డాడు. ఈ అమానుష ఘటన జిల్లాలోని కమలాపూర్ మండలంలో చోటుచేసుకుంది. పోలీసులు తెలిపిన వివరాల మేరకు, మర్రిపల్లెగూడెం గ్రామానికి చెందిన ఇనగాల విజయ్‌కుమార్ సర్పంచ్ ఎన్నికట్లో పోటీ చేయాలని భావించి తన రెండో భార్య జ్యోత్స్నకి విడాకులిచ్చాడు. మున్సిపల్ ఉద్యోగిగా పనిచేస్తున్న ఆమె అదే గ్రామానికి చెందిన ఇనగాల తిరుపతిని ప్రేమించి పెళ్లి చేసుకుంది. తన మాజీ భార్య పెళ్లి ఫొటోలు సోషల్ మీడియాలో వైరల్ కావడంతో విజయ్ కుమార్ తట్టుకోలేకపోయాడు. ఆమె భర్త తిరుపతిపై కక్ష పెంచుకున్నాడు.

అదే విషయమై తిరుపతిపై విజయ్ కుమార్ కిడ్నాప్ కేసు పెట్టించి జైలుకి పంపించాడు. బెయిల్‌పై బయటకు వచ్చిన తిరుపతిపై ఎలాగైనా పగ తీర్చుకోవాలని రగిలిపోయాడు. అతని వద్ద అప్పు తీసుకున్న తిరుపతి తమ్ముడు మధుని పిలిచి వెంటనే తన డబ్బులు తిరిగివ్వాలంటూ వేధించడం మొదలుపెట్టాడు. డబ్బులు తిరిగి చెల్లించలేకపోవడంతో మధుని బూతులు తిడుతూ చెప్పుతో కొట్టాడు. అది వివాదానికి దారితీసి విజయ్ కుమార్‌పై కేసు నమోదైంది. తిరుపతి ప్రమేయంతోనే ఇదంతా జరిగిందని భావించిన విజయ్ ఆగ్రహంతో రగిలిపోయాడు. ఎలాగైనా తిరుపతిని అంతమొందించాలని తన అనుచరులతో హత్యాయత్నం చేయించాడు. గ్రామంలోని అరుగుపై కూర్చుని ఉన్న తిరుపతిపై ఇనగాల కుమార్, రాజు, రవి, సాంబయ్య, మొగిలి తదితరులు కత్తులతో విచక్షణా రహితంగా దాడి చేశారు. కొట్టుకుంటూ చెరువు కట్టపైకి తీసుకెళ్లి కత్తులతో పొడిచేశారు.

తీవ్రగాయాలపాలై అపస్మారక స్థితికి చేరుకున్న దుండగులు అక్కడి నుంచి వెళ్లిపోయారు. విషయం తెలుసుకున్న మధు రక్తపు మడుగులో పడి ఉన్న తిరుపతిని 108 వాహనంలో వరంగల్ ఎంజీఎం ఆస్పత్రికి తీసుకెళ్లాడు. దుండగుల దాడిలో తిరుపతి చెయ్యి మణికట్టు వరకూ తెగిపడింది. తీవ్రగాయాలపాలైన బాధితుడి పరిస్థితి ప్రస్తుతం విషమంగా ఉన్నట్లు తెలుస్తోంది. బాధితుడి సోదరుడు మధు ఫిర్యాదు మేరకు పోలీసులు కేసు నమోదు చేసి నిందితులను అరెస్టు చేశారు. ఇనగాల విజయ్‌లో పాటు జ్యోత్స్నని కూడా పోలీసులు కోర్టులో హాజరుపరిచారు. హత్యాయత్నంలో భార్య జ్యోత్స్న ప్రమేయంపై స్పష్టత రావాల్సి ఉంది.