{"uid":"EA9684FB-092A-4DFE-B413-F44AFB16F789_1625738478237","source":"other","origin":"gallery"}

ఇన్‌స్టాగ్రామ్‌ల‌లో డ్యాన్సులు ఫేస్‌బుక్‌లో చాటింగులతో గడిపేస్తూ ఏదో రోజు తాను స్టార్ అయిపోతానంటూ భార్య వేస్తున్న వేషాలు చూడలేక ఓ భర్త నలిగిపోయాడు. ఎంత చెప్పినా భార్య పద్ధతి మార్చుకోకపోవడంతో తనలో తానే చిద్రవధ అనుభవించి చివరికి బలవంతంగా ప్రాణాలు తీసుకున్న అత్యంత విషాద ఘటన హైదరాబాద్‌లో వెలుగుచూసింది. మృతుడి కుటుంబ సభ్యులు, బంధువుల కథనం మేరకు సనత్‌నగర్ పోలీస్ స్టేషన్ పరిధిలోని ఫతేనగర్‌కి చెందిన పవన్ నీమ్‌కర్(34)కి ఆరేళ్ల కిందట 2015లో మౌలాలికి చెందిన ప్రియాంకతో వివాహమైంది. కొద్దికాలం కాపురం సాఫీగానే సాగినా ఇద్దరి మధ్య మనస్పర్థలు తలెత్తినట్లు తెలుస్తోంది. పెళ్లై ఆరేళ్లు గడుస్తున్నా సంతానం కలగకపోవడంతో గొడవలు ముదిరాయి. సోషల్ మీడియాకు బానిసగా మారిన ప్రియాంక నిత్యం ఇన్‌స్టాగ్రామ్, ఫేస్‌బుక్‌లలో బిజీగా గడిపేది. డ్యాన్సులు, యాక్టింగ్ వీడియోలు తీసుకుని సోషల్ మీడియాలో పోస్టు చేయడం వ్యసనంగా మారినట్లు తెలుస్తోంది.

అవి తనకు ఇష్టం ఉండవని భర్త పవన్ మొత్తుకున్నా ఆమె పట్టించుకోలేదు. ఏదో రోజు తాను స్టార్‌ని అయిపోతానంటూ భర్త మాటలు పెడచెవిన పెట్టింది. ఆ విషయమై ఇద్దరి మధ్య గొడవలు జరిగేవి. ప్రైవేటు ఉద్యోగం చేస్తున్న పవన్ కరోనా కష్టకాలంలో జాబ్ కోల్పోవడంతో తీవ్ర ఇబ్బందులు ఎదురయ్యాయి. రెండు రోజుల కిందట శుక్రవారం భార్య ప్రియాంకను మౌలాలిలోని తన పుట్టింట్లో వదిలిపెట్టి ఇంటికి వచ్చాడు. అదే రోజు రాత్రి మరోమారు భార్యాభర్తలు ఫోన్‌లో గొడవపడినట్లు చెబుతున్నారు. ఒకవైపు భార్య ప్రవర్తన మరోవైపు ఆర్థిక కష్టాలు భరించలేక పవన్ కుంగిపోయి దారుణ నిర్ణయం తీసుకున్నాడు. ఇంట్లో ఉరి వేసుకుని ఆత్మహత్య చేసుకున్నాడు. గమనించిన కుటుంబ సభ్యులు వెంటనే పోలీసులకు సమాచారం అందించారు. సంఘటన స్థలానికి చేరుకున్న పోలీసులు మృతదేహాన్ని పరిశీలించి పోస్టుమార్టం కోసం ఉస్మానియా ఆస్పత్రికి తరలించారు.

కొడుకు మరణానికి కోడలు ప్రియాంక కారణమని అతని కుటుంబ సభ్యులు పోలీసులకు ఫిర్యాదు చేశారు. అయినా పట్టించుకోలేదంటూ డీసీపీ పద్మజా రెడ్డిని ఫిర్యాదు చేసినట్లు తెలుస్తోంది. అయితే తన భర్త మరణంపై అనుమానాలు ఉన్నాయని భార్య ప్రియాంక సనత్ నగర్ పోలీసులకు ఫిర్యాదు చేయడం గమనార్హం. పోలీసులు విచారణ జరుపుతున్నారు. అయితే అతని బంధువులు మృతుడి భార్య ప్రియాంకపై తీవ్ర ఆరోపణలు చేస్తున్నారు. ఎప్పుడూ ఫేస్‌బుక్‌లు, ఇన్‌స్టాగ్రామ్‌లో వీడియోలు చేస్తూ ఉండేదని చెప్పినా లెక్కచేసేది కాదని చెబుతున్నారు. ఆఖరికి జీతం రూ.50 వేలు తనకు తెచ్చిస్తేనే పిల్లల్ని కనడం కుదురుతుందని ఆమె తెగేసి చెప్పిందంటూ సంచలన ఆరోపణలు చేస్తున్నారు. ఇప్పటికే ఒకడు చనిపోయాడు, ఇప్పుడు మరొకడు పోతాడంటూ తమ ముందే చాలా నిర్లక్ష్యంగా మాట్లాడిందని ఆమె వేధింపులు భరించలేకనే పవన్ ఆత్మహత్య చేసుకున్నాడని ఆగ్రహం వ్యక్తం చేస్తున్నారు. వాటికి తోడు ప్రియాంక ఇన్‌స్టాగ్రామ్ వీడియోలు, ఆమె ఫొటోలు వైరల్‌గా మారాయి.