దక్షిణకన్నడ జిల్లా సూరత్కల్‌లో ఆస్పత్రిలో మహిళలు బట్టలు మార్చుకొనే గదిలో రహస్యంగా కెమెరాను అమర్చి వీడియో తీస్తున్న పురుష నర్సింగ్‌ విద్యార్థిని పోలీసులు అరెస్ట్‌ చేశారు. ఆస్పత్రిలో పని చేస్తున్న నర్సింగ్‌ విద్యార్థి పవన్‌కుమార్‌ ఈ పనికి పాల్పడ్డాడు. వివరాల ప్రకారం: కలబురిగికి చెందిన పవన్‌ బజపెలో నివాసం ఉంటూ ఆస్పత్రిలో శిక్షణ పొందుతున్నాడు. కాగా, ఆస్పత్రికి వచ్చే రోగులు స్కానింగ్‌కు వెళ్లే ముందు బట్టలు మార్చుకొంటారు. దీంతో, ఆ గదిలో రహస్య కెమెరాను అమర్చి వీడియోలు తీసేవాడని బయట పడింది. ఇటీవల ఓ యువతికి ఆ గదిలో అనుమానం వచ్చి పరిశీలించగా ఒక మూల కెమెరా కనిపించింది. ఆమె ఫిర్యాదుతో పవన్‌ను పోలీసులు పట్టుకున్నారు.