దిశ తల్లిదండ్రులకు న్యాయం జరిగినందున వారు సంతోషించవచ్చు, కానీ నాలాంటి వారి పరిస్థితి ఏమిటి?

దిశపై అఘాయిత్యానికి పాల్పడి అన్యాయం చేసిన వారు సామాన్యులు, ఎటువంటి రాజకీయ అండదండలు లేవు కాబట్టి ఈజీగా వారిని కాల్చిచంపేశారని, అదే తన కుమార్తె విషయంలో ఇప్పటికీ ఎందుకు న్యాయం జరగడం లేదని పన్నెండేళ్ల క్రితం అత్యాచారానికి, హత్యకు గురైన అయేషా మీరా తల్లి శంషాద్ బేగం ప్రశ్నించారు.

దిశ హత్యకేసు నిందితుల ఎన్‌కౌంటర్ నేపథ్యంలో ఆమె స్పందించారు. ‘దిశ తల్లిదండ్రులకు న్యాయం జరిగినందున వారు సంతోషించవచ్చు, కానీ నాలాంటి వారి పరిస్థితి ఏమిటి?’ అని ప్రశ్నించారు. తన కుమార్తె ఆయేషాకు ఇంత అన్యాయం జరిగినా ఇప్పటికీ తమకు న్యాయం జరగలేదని, కుమార్తె ఆత్మ శాంతించలేదని వారు వాపోయారు. సజ్జనార్ లాంటి పోలీసు అధికారి తమ కుమార్తె కేసు దర్యాప్తు చేసి ఉంటే తమకు న్యాయం జరిగి ఉండేదేమోనని ఆశాభావం వ్యక్తం చేశారు. పందొమ్మిదేళ్ల ఫార్మసీ విద్యార్థిని అయేషా మీరాను గుర్తు తెలియని వ్యక్తులు 2007, డిసెంబరు 27న విజయవాడలోని ఆమె నివాసం ఉంటున్న హాస్టల్ లోనే అత్యాచారం చేసి హత్య చేసిన విష‌యం తెలిసిందే.