ప్రైవేట్ ఆస్పత్రుల్లో ఐసీయూలోకి వెళ్లాలంటే సెక్యూరిటీకీ యాభయ్యో, వందో సమర్పించుకోవాల్సిన పరిస్థితి. అలాంటిది కరోనా టైమ్ లో కొవిడ్ ఆస్పత్రిలో లోపల ఉన్న వారిని పలకరించాలంటే ఎలా సాధ్యమవుతుంది. ఇలాంటి వారి కోసం ఓ కిలాడీ లేడీ డాక్టర్ అవతారమెత్తింది. విజయవాడలోని కొవిడ్ ఆస్పత్రిలో పీపీఈ కిట్ ధరించి రోగి బంధువులను ఐసీయూలోకి తనతోపాటు తీసుకెళ్తోంది ఈమె. అసలు డాక్టర్లకు అనుమానం వచ్చి ప్రశ్నిస్తే బండారం బైటపడింది. బుధవారం కూడా ఈమె మెడలో స్టెత్‌ వేసుకుని సూపర్‌స్పెషాలిటీ బ్లాక్‌లోని గ్రౌండ్‌ఫ్లోర్‌కు వచ్చింది. అక్కడ స్టోర్‌కు వెళ్లి డాక్టర్‌ శైలజ అని రిజిస్టర్‌లో రాసి పీపీఈ కిట్‌ తీసుకుంది. అనంతరం అక్కడే తచ్చాడుతుండగా, కొందరు సిబ్బందికి అనుమానం వచ్చి, మీరు ఎవరని ప్రశ్నించగా, ‘ఐయామ్‌ డాక్టర్‌ శైలజ’ అని చెప్పింది. ఏ విభాగంలో పనిచేస్తారని అడగ్గా, ఇక్కడే కోవిడ్‌ హాస్పటల్‌లో అని చెప్పింది.

ఆమె ప్రవర్తనపై అనుమానం వచ్చిన సిబ్బంది పీపీఈ తీసుకుంటే సంతకం పెట్టాలని చెప్పి పక్కనే ఉన్న రూమ్‌లోకి తీసుకెళ్లారు. అనంతరం అక్కడ కూర్చోపెట్టి ఐడెంటిటీ కార్డు అడగ్గా, తనవద్ద లేదని ఒకసారి, మా బంధువులు వస్తానంటే వచ్చానని మరోసారి, ఆయుర్వేద వైద్యురాలినని, బంధువులు ఐసీయూలో ఉంటే చూసేందుకు వచ్చానని ఇలా పొంతన లేని సమాధానాలు చెబుతుండటంతో ఆస్పత్రి సిబ్బంది ఆమెపై మాచవరం పోలీసులకు ఫిర్యాదు చేశారు. దీంతో పోలీసులు ఆస్పత్రికి చేరుకుని ఆమెను స్టేషన్‌కు తరలించారు. అక్కడ విచారించగా ప్రసాదం పాడు అని, పోస్టు గ్రాడ్యుయేషన్‌ చదివినట్లు తెలిసింది. డాక్టర్‌ అవతారం ఎత్తి ఎందుకు వచ్చిందనే విషయం ఇంకా తెలియలేదు. కాగా కేసు నమోదు చేసి విచారణ చేస్తున్నట్లు తెలిపారు. కోవిడ్‌ ఆస్పత్రి నుంచి రావడంతో, ఆమెకు ఎక్కడ కరోనా సోకిందోనని పోలీసులు సైతం భయపడుతున్నట్లు తెలిసింది.

డాక్టర్‌ శైలజ పేరుతో సదరు మహిళ నాలుగు రోజులుగా ఐసీయూలో తిరుగుతున్నట్లు వైద్య సిబ్బంది చెబుతున్నారు. ఇటీవల కొత్తగా 80 మంది వైద్యులు రావడంతో వారిలో ఒకరై ఉంటారని సిబ్బంది భావించారు. అంతేకాకుండా పీపీఈ వేసుకోవడంతో గుర్తుపట్టలేక పోయినట్టు చెబుతున్నారు. ఇలా తనతో పాటు మరొకరిని తీసుకుని ఐసీయూల్లోకి వెళ్తుందని చెబుతున్నారు. ఐసీయూలో చికిత్స పొందుతున్న రోగుల వద్దకు వారి బంధువులను శైలజ.. డాక్టర్ వేషం వేసి తీసుకెళ్తున్నట్లు చెబుతున్నారు.